KITWANGA HADHARANI BAADA YA KIMYA KIREFU

Dar es Salaam. Baada ya kimya cha muda mrefu, hatimaye aliyekuwa Waziri wa Mambo ya Ndani, Charles Kitwanga ameibuka na kukabidhi ofisi na akatoa ratiba ya shughuli zake katika Jimbo lake la Misungwi ikiwamo ibada ya shukrani.

Kitwanga, ambaye uwaziri wake ulitenguliwa Mei 20 na Rais John Magufuli, baada ya kuingia na kujibu swali bungeni akiwa amelewa, alikabidhi ofisi jana kwa Mwigulu Nchemba ambaye amechukua nafasi yake.

Baada ya kutenguliwa uteuzi wake, hakuwahi kuonekana hadharani kwa maelezo kuwa alikuwa amekwenda Israel kwa ajili ya shughuli zake.